Isinay Stories from Aritao: How Aritao Got Its Name

Ni^butan di Ngaronar di Aritao

EUFRONIO LAROSA, SR.
(Octobre 2, 1976)

Ana^, iv-iva, da^da-e on bisitas mi an mandonge si satiyen estoryo^ ira^yu besan.

Si lu-ang uwar an manbasa-basa on man-ada-adal mu sangkanan ningaranan tiyen beveyoy si Aritao, nayir lan urum an binasa^ si sinulat omu dingnge^ mu sangkanan ningaranan tiyen beveyoy si Aritao.

Bayaw ot diyoy si osan nambasaa^ si damdaman estorya an mu sangkanan nangaranan di osar an barrios di beveyoyar Pingkian si Santa Cruz. Satiye ya osan parten di estorya nar tiyen beveyoy Santa Cruz.

Mu sangkanan ningaranan diyen beveyoy toy mi^bus toy war papariyar darin naun-una an dimmatong situn provinsiya ya nanlaar datdi ba^yurar ningaranan si Bantay Lakay. Nanlaar datdi ot impas dat osan lugar an Pingkian.

Si osan lugar ya nanmisa ra, nanloov ra. Sinelebrasyon da ri osar an misa, ot dipan la ri misar siri ba^yurar siri Pingkian, ningaranan da riyen lugar si Santa Cruz. Dipan la riye loovar o misar siri Santa Cruz, immali rattu doteyar situ Aritao an besan mo.

Ya datong dar situ Aritao, mi^bus eman toy war tahuwar sirin poto^ ya nayir lan osa irira si manuttuwa si na-inkristiyanowanar an panuttuwa atdi ela papariyar darin niluuy si Espaniolar dari, ya inselebrar da omu inappiya rattu beveyoyar Aritao, siri lugarar an mingaranan si Ituy, riye primerowar poddan loov omu misa.

On mi^bus toy war ehawar an niselebra di primerowar poddan loov omu misattu beveyoyar ya nipto^ si ehawar an ingngaranan da besan si Ingles an Christ the King. Sarin ehhaw si ehaw riye Apu ta^war an Jesu Cristo, arin di tahuwar dari.

Andoholan si panuttuwaar on si pan-ad-adal uwar on inpandondongnge-ar, si uritti-ar an panrisersing u an inappiya^, ya manuttuwa^ an mu sangkanan ningaranan tiyen beveyoy si mangkaplatanar an ngarona mi^bus toy war primerowar podda omu na-un-unar poddan misa na niselebrar situ beveyoyar Ituy ya ehaw riye Aputa^war Jesu Cristo.

Andoholan ingngaranan tiyen beveyoy an Aritao, gosto nan ba^ba-on an arin diye lom-an di tahuwar dari.

Satu lohom on tandalan yu otiya tiyen uunga.

GLOSSARY
Aputa^war Jesu Cristo ― our Lord Jesus Christ
arin di tahuwar dari ― the people’s king
ba^yurar ningaranan si Bantay Lakay ― mountain named Mount Old Man
dingnge^ ― I heard
dipan la ri misar ― immediately after the mass
estoryo^ ― I will tell the story
gosto nan ba^ba-on ― in other words
immali rattu doteyar situ ― they came to this place
impas ― went down
inpandondongnge-ar ― what I heard
Ituy ― name of Southern Nueva Vizcaya particulalry Aritao, Dupax and Bambang
lu-ang ― based on
manbasa-basa on man-ada-adal ― reading and studying
mangkaplatanar an ngaronna ― its present name
mi^bus toy ― because
mu sangkanan ningaranan tiyen beveyoy si Aritao ― why this town was named Aritao
nambasaa^ ― my reference, something I read
nanmisa ra, nanloov ra ― they offered mass
nipto^ ― coincided
panrisersing u an inappiya^ ― the research I personally made
panuttuwaar ― my belief
primerowar podda ― the very first
satu lohom ― this is all
tandalan ― remember
uunga ― children